Méadú chuig €40M tagtha ar bhrabús daa de bharr ardú ar Líon na bPaisinéirí
Tháinig méadú 41% ar bhrabús iarchánach oibreoir aerfoirt daa anuraidh go dtí €40 milliún, de bharr méadú ar líon na bpaisinéirí agus ar an ioncam tráchtála, agus rinne a ghnó miondíola thar lear go maith i margaí a bhfuiltear ag leanúint leo.
Tháinig méadú 13% ar láimhdeachas úabác go dtí €564 milliún, le cabhair ó ioncaim níos airde ó mhuirir aerloingseoireachta agus ó ioncam níos airde ó ghníomhaíochtaí tráchtála in Éirinn agus thar lear. Tháinig méadú 13% ar thuilleamh roimh ús, cánachas, dímheas agus amúchadh, go dtí €182 milliún anuraidh.
Nuair a chuirtear nithe eisceachtúla san áireamh, tháinig laghdú 50% ar bhrabús iarchánach go dtí €19 milliún in 2014. Tharla an laghdú mar thoradh ar thionchar mhuirear eisceachtúil €21 milliún a bhain i bpáirt le hinfheistíocht €72 milliún a rinneadh chun ceist na bpinsean ag an gcuideachta a réiteach, a bhí gan réiteach le fada.
“Rinne daa dul chun cinn maith in 2014,” dar leis an bPríomhfheidhmeannach, Kevin Toland. “Ba í sin an bhliain ab airde fás ar líon na bpaisinéirí ó 2007 agus bhí feidhmíocht láidir ag ár ngnólacht miondíola taistil idirnáisiunta ARI i margaí a bhfuiltear ag leanúint leo.”
Tháinig méadú 6% ar dhíolacháin miondíola iomlána in Aerfort Bhaile Átha Cliath agus in Aerfort Chorcaí go dtí €227 milliún anuraidh mar gheall gur fhan an meánmhéid airgid arna chaitheamh ag paisinéirí mar a bhí an bhliain roimhe, d’ainneoin na héifeachta a bhí ag uasghrádú ollmhór ar an limistéar miondíola i gCríochfort 1, Aerfort Bhaile Átha Cliath. Osclaíodh an chéad chéim den tionscadal seo i mí an Mhárta agus tá trádáil mhaith ar siúl ann.
Lean daa ar aghaidh ag laghdú a chuid fiachas le linn na bliana, agus tháinig laghdú €14 milliún ar an nglanfhiachas go dtí €600 milliún. Ó bhí 2010 ann, tá a fhiachas laghdaithe ag an nGrúpa faoi €164 milliún. Tháinig méadú 13% ar chostais oibriúcháin go dtí €282 milliún, mar thoradh go príomha ar an tionchar ó cheannachán thar lear. Tháinig méadú 4% ar chostais ag daa, agus tháinig méadú 6% ar líon na bpaisinéirí ag aerfort Bhaile Átha Cliath agus ag Aerfort Chorcaí go dtí 23.9 milliún anuraidh.
Tháinig méadú 8% ar líon na bpaisinéirí ag aerfort Bhaile Átha Cliath go dtí 21.7 milliún anuraidh, agus taifeadadh fás i ngach príomh-earnáil den mhargadh. Cuireadh fáilte roimh 1.5 milliún paisinéir breise anuraidh, an líon ab airde riamh de phaisinéirí trasatlantacha agus paisinéirí le haghaidh gnó aistrithe. Bhí an trácht cianaistir 14% níos airde agus tháinig méadú 37% ar líon na bpaisinéirí aistrithe go dtí 749,000 anuraidh, an líon ab airde riamh.
Tháinig méadú 14% ar thrácht trasatlantach Bhaile Átha Cliath go dtí 2.1 milliún paisinéir – an líon ab airde riamh. Sin fás 42% le ceithre bliana anuas. Ciallaíonn an méadú mór ar eitiltí go Meiriceá Thuaidh go mbeidh Baile Átha Cliath ar an séú haerfort is mó san Eoraip an samhradh seo amach romhainn maidir le nascacht thrasatlantach. Ní bheidh níos mó eitiltí chuig na Stáit Aontaithe agus Ceanada ag aon aerfort eile ach amháin moil Heathrow, Schiphol Amstardam, Paris CDG, Maidrid agus Frankfurt.
“Is imreoir suntasach sa mhargadh trasatlantach san Eoraip anois é Aerfort Bhaile Átha Cliath a chuirfidh 328 eitilt a bhaineann le Meirceá Thuaidh ar fáil in aghaidh na seachtaine an samhradh seo chuig 15 cheann scríbe éagsúil agus uathu,” dar leis an Uasal Toland. “Creidimid go bhfuil deis ann fós an gnó seo a fhás tuilleadh, rud a chuirfidh breis nascachta ar fáil dár gcuid custaiméirí agus a mhéadóidh an trácht aistrithe ag Baile Átha Cliath.”
Ba é margadh na Breataine a sholáthair an fás ba mhó i dtéarmaí méid in Aerfort Bhaile Átha Cliath anuraidh, nuair a tháinig méadú 8% go dtí 7.8 milliún ar an líon paisinéirí ar eitiltí idir Baile Átha Cliath agus cinn scríbe sa Bhreatain, agus 604,000 níos mó daoine ag taisteal. Tháinig méadú 5% ar líon na bpaisinéirí idir Aerfort Bhaile Átha Cliath agus Mór-Roinn na hEorpa go dtí 11.1 milliún anuraidh agus tháinig méadú 19% ar an trácht idirnáisiúnta eile go dtí 643,000, an líon ab airde riamh. Tháinig méadú 19% ar an trácht chuig an Meánoirthear agus an Afraic Thuaidh go dtí 634,000, an líon ab airde riamh.
Beidh 21 seirbhís nua ag Aerfort Bhaile Átha Cliath i mbliana; 16 oibríocht ghearraistir nua agus cúig bhealach cianaistir nua.
Tháinig laghdú 5% ar an trácht ag Aerfort Chorcaí anuraidh go dtí 2.1 milliún paisinéir, mar thoradh go príomha ar roinnt dá chuid príomhbhealaí Eorpacha á n-aistriú go hAerfort na Sionainne. Príomhchúram don chuideachta ná líon na bpaisinéirí ag Corcaigh a chobhsú agus a chur ag fás arís. Cuirfear fáilte roimh thrí sheirbhís nua ag Aerfort Chorcaí i mbliana, an dara haerfort is mó sa Stát.
De réir staidéar nua a rinne na sainchomhairleoirí eacnamaíochta InterVISTAS, cuirtear fostaíocht dhíreach agus indíreach ar fáil ag Aerfort Bhaile Átha Cliath agus ag Aerfort Chorcaí do 48,000 post, agus tacaítear leis sin le 13,400 post eile i ngeilleagar na hÉireann.
Fuarthas amach tríd an staidéar go dtugtar tacaíocht agus éascú do 108,000 post agus go gcuirtear €7.6 billiún in aghaidh na bliana le hOlltáirgeacht Intíre (GDP) na hÉireann nuair a chuirtear san áireamh na buntáistí níos leithne a chruthaítear de bharr na haernascachta a chuireann Aerfort Bhaile Átha Cliath agus Aerfort Chorcaí ar fáil i réimsí mar turasóireacht, trádáil agus infheistíocht dhíreach eachtrach.
“Ní hamháin gurb iad na tairsí is mó chuig an Stát iad Aerfort Bhaile Átha Cliath agus Aerfort Chorcaí, is eintitis ollmhóra iontu féin iad,” a dúirt an tUasal Toland. “Fuarthas amach tríd an staidéar go n-éascaítear 97,400 post in Aerfort Bhaile Átha Cliath agus go bhfuil tionchar eacnamaíochta iomlán €6.9 billiún aige, arb ionann é agus 4% de GDP na hÉireann. Éascaítear agus tacaítear le 10,700 post in Aerfort Chorcaí agus is fiú 2.2% den gheilleagar réigiúnach é sin in iardheisceart na hÉireann.”
“Féachann roinnt tráchtairí ar ár gcuid aerfort mar ionadaithe le haghaidh thurasóireacht na hÉireann, ach tugann an tuarascáil seo soiléiriú ar an ról ríthábhachtach atá ag Aerfort Bhaile Átha Cliath agus ag Aerfort Chorcaí i ngeilleagar iomlán na hÉireann,” a dúirt an tUasal Toland freisin.
Bhí tús láidir ag daa in 2015 maidir le paisinéirí, agus méadú 15% ar líon iomlán na bpaisinéirí go dtí seo i mbliana. Go dtí seo i mbliana, tháinig méadú 17% ar líon na bpaisinéirí i mBaile Átha Cliath go dtí 6 mhilliún, ach i gCorcaigh, tháinig laghdú 5% ar líon na bpaisinéirí go dtí 490,000.
Bhí feidhmíocht mhaith ag rannóg thar lear de ghnólacht miondíola taistil daa, ARI, in 2014, le méadú 10% ar dhíolacháin ag suímh a bhfuiltear ag leanúint leo. Tháinig laghdú ar bhrabús ARI ó €29 milliún go dtí €18 milliún bliain ar bhliain, mar gur bhain sé leas in 2013 as tionchar aon-uaire a chuid oibríochtaí sa Rúis agus san Úcráin a dhíol. Tháinig méadú 50% ar bhrabús comhionann shuímh idirnáisiúnta ARI go dtí €18 milliún anuraidh.
Le linn na bliana, fuair ARI smacht iomlán ar CTC-ARI, a fheidhmíonn asraonta saor ó dhleacht sa Chipir, i mbeart arbh fhiú €55 milliún é. Tháinig méadú 3% ar líon na bpaisinéirí ag Aerfort Dí¼sseldorf, ar le ARI 20% de, go dtí 21.8 milliún anuraidh, an líon ab airde riamh.
Rinneadh dul chun cinn suntasach le linn na bliana ar na saincheisteanna a raibh tionchar acu le fada an lá ar an scéim pinsin IASS ilfhostóra. Chuir an tIontaobhaí stop leis an scéim, a chuimsigh fostaithe ó daa, Aer Lingus, agus SRT, ag deireadh na bliana seo caite.
Thug daa scéim pinsin ranníocaíochtaí sainithe nua isteach i mí Eanáir agus le seachtainí beaga anuas vótáil na baill foirne glacadh le tairiscint pinsin na cuideachta.
“Ceist thar a bheith casta agus deacair a bhí anseo le dul i ngleic léi, ach le tacaíocht agus rannpháirtíocht na bpáirtithe leasmhara, baineadh amach an toradh ab fhearr ab fhéidir agus cúinsí mar a bhí,” a dúirt an tUasal Toland.
Tuilleadh eolais:
Paul O’Kane 353 1 814 1897, 353 86 609 0221
Siobhan O’Donnell 353 1 814 4108, 353 87 271 0065